Ասոցիացիայի մասին

Բուհի հիմնադրումից անցավ գրեթե 7 տասնամյակ, մինչև Պոլիտեխնիկի տարբեր տարիների շրջանավարտները կայացրին իրենց միավորող հարթակ ստեղծելու որոշումը: Հաշվի առնելով Պոլիտեխնիկի անվանափոխման հանգամանքը, նորաստեղծ կազմավորումը կոչեցին «ԵրՊԻ-ՀՊՃՀ շրջանավարտների միություն» (ՇՄ): Շնորհանդեսը տեղի ունեցավ 2001թ. մայիսի 31-ին, նախագահ ընտրվեց Էդվարդ Սանդոյանը: Երկու տարի անց կազմակերպության ղեկավարումը վստահվեց վարչապետ Անդրանիկ Մարգարյանին: Ստեղծման պահին Շրջանավարտների միությունն ուներ 220 անդամ:

2006թ. մայիս-հունիս ամիսներին կատարվեցին կազմակերպական փոփոխություններ. կառույցը վերանվանվեց «ԵրՊԻ-ՀՊՃՀ շրջանավարտների ասոցիացիա» հ/կ, ձևավորվեց համալսարանի շրջանավարտ, պետական, հանրային ու բիզնես ոլորտներում հեղինակություն ունեցող հայտնի ներկայացուցիչներով բաղկացած կառավարման խորհուրդ:
 Հայաստանում և արտերկրում հաջողության հասած Պոլիտեխնիկի շրջանավարտները ձգտում էին նպաստ բերել հարազատ բուհին ու այդ նպատակով ասոցիացիայի մասնաճյուղեր ստեղծեցին ԱՄՆ-ում և Ռուսաստանում: Ասոցիացիայի գործունեության անկյունաքարային կետերից է եղել 2006թ. դեկտեմբերին «Պոլիտեխնիկ» գիտակրթական հիմնադրամի ստեղծումը, որը, նվիրատվությունները համակարգելով՝ ներդրումներով առ օյսօր աջակցում է համալսարանի առաջնահերթ ծրագրերի իրականացմանը: Հիմնադրամի ստեղծման ակունքում կանգնած «Գրանդ հոլդինգ», Զանգեզուրի պղնձամոլիբդենային կոմբինատ, «Սիլ գրուպ», «Մաքուր գրուպ», «Մաքուր երկաթ», «Սինոփսիս Արմենիա» ընկերությունների ղեկավարները Պոլիտեխնիկի շրջանավարտներն են: Այսօր Պոլիտեխնիկն ընթանում է 21-րդ դարի կրթական մարտահրավերների հաղթահարման ճանապարհով՝ թիկունքում զգալով իր շրջանավարտ-նվիրյալների ամուր աջակցությունը: